पिंपरी (दि. २९ नोव्हेंबर २०२५) :- पिंपरी चिंचवड पोलीस आयुक्तालयाच्या परिमंडळ-०१ वाहनचोरी विरोधी विशेष पथकाने मोठी कारवाई करत सराईत चोरट्यांच्या टोळीचा पर्दाफाश केला आहे. या पथकाने एकूण १५ लाख रुपये किंमतीच्या ३७ मोटारसायकली आणि २ ऑटो रिक्षा जप्त करून ३४ गुन्हे उघडकीस आणले आहेत.
पोलीस आयुक्त विनयकुमार चौबे यांच्या आदेशानुसार, परिमंडळ-०१ मध्ये वाढलेल्या वाहनचोरीच्या घटनांवर नियंत्रण आणण्यासाठी विशेष पथक तयार करण्यात आले. सहा. पोलीस निरीक्षक दिगंबर अतिग्रे यांच्या नेतृत्वाखालील पथकाने १०० ते १५० सीसीटीव्ही फुटेज चेक करत संशयितांची माहिती मिळवली.
पथकाने पिंपरी, भोसरी, सांगवी, निगडी, संत तुकाराम नगर, रावेत यांसह पुणे-मुंबईतील विविध ठिकाणांवरील गुन्हे उघडकीस आणले. पाच आरोपींसह काही विधीसंघर्षित बालकांना ताब्यात घेण्यात आले आहे. या कारवाईमध्ये डीसीपी संदिप आटोळे, सहा. पोलीस आयुक्त सचिन हिरे, वरिष्ठ पोलीस निरीक्षक अशोक कडलग यांचे मार्गदर्शन लाभले. विशेष पथकातील १५ पेक्षा अधिक अधिकारी-अंमलदारांनी ही संयुक्त मोहीम यशस्वी केली.
