पिंपरी (दि. २९ नोव्हेंबर २०२५) :- सांगवी व औंध परिसरात बिबट्याचे दर्शन झाल्यानंतर नागरिकांत भीतीचे सावट पसरले असून दैनंदिन हालचालींवर त्याचा परिणाम स्पष्ट दिसत आहे. ब्रेमन चौक व परिसरात बिबट्या फिरल्याच्या चर्चेमुळे सांगवीकरांनी सकाळ-संध्याकाळच्या फिरण्यावर मर्यादा घातल्या आहेत. सांगवी-बोपोडी पूल, दत्त मंदिर परिसर, औंध उरो रुग्णालय परिसर अशा शांत ठिकाणी फिरण्यासाठी जाणारे नागरिक आता बाहेर पडणे टाळत आहेत.
औंधमधील बिबट्या अद्याप पकडला न गेल्याने परिस्थिती अधिक चिंताजनक बनली आहे. वनविभागाने शोधमोहीम सुरू असल्याचे सांगितले असून प्राथमिक फुटेजनंतर पुढील ठोस पुरावे मिळाले नसल्याचे स्पष्ट केले आहे.
वनरक्षक कृष्णा हाके यांनी नागरिकांना पहाटे किंवा रात्री एकटे बाहेर न पडण्याचा, परिसरात प्रकाशयोजना ठेवण्याचा, पाळीव प्राण्यांना सुरक्षित ठेवल्याचा व बिबट्या दिसल्यास १९२६ वर संपर्क करण्याचा सल्ला दिला आहे. दरम्यान, मावळ तालुक्यातील आंबी-शिरगाव भागातही बिबट्याचे व्हिडिओ वायरल होत असल्याने नागरिकांत चिंतेचे वातावरण आहे.
