पिंपरी (दि. ०५ डिसेंबर २०२५) :- पुणे महानगर प्रदेश विकास प्राधिकरणाचे (PMRDA) आयुक्त योगेश म्हसे यांच्यासोबत मावळ तालुक्यातील विविध विकासकामांचा सविस्तर आढावा घेण्यासाठी आमदार सुनील शेळके यांच्या प्रमुख उपस्थितीत उच्चस्तरीय बैठक पार पडली.
मावळच्या प्राधान्य असलेल्या प्रकल्पांना तात्काळ चालना देण्यासाठी मंजूर आणि निविदा प्रक्रिया पूर्ण झालेल्या सर्व कामांना लगेच सुरुवात करण्याबाबत या बैठकीत ठोस चर्चा झाली.
देहू–येलवाडी रस्ता तातडीने सुरू करणे, परंडवाल चौक–देहू ते तळवडे रस्त्याच्या दुसऱ्या टप्प्याची निविदा प्रक्रिया पूर्ण करणे, पावसामुळे रखडलेली रस्त्यांची कामे पूर्णत्वाकडे नेणे, पुणे–मुंबई महामार्गावरील चौकांचे रुंदीकरण व सुशोभीकरण, गडकिल्ल्यांकडे जाणाऱ्या रस्त्यांचे सुधारणा काम तसेच इंद्रायणी व पवना नदीतील प्रदूषण रोखण्यासाठीच्या तातडीच्या उपाययोजनांवरही सखोल चर्चा झाली.
या बैठकीत आमदार सुनील शेळके यानी सर्व कामे गतीने व दर्जेदार पद्धतीने पूर्ण करण्याचे निर्देश दिले. PMRDA आयुक्त योगेश म्हसे यांच्यासह बांधकाम विभागाचे आणि इतर संबंधित विभागांचे वरिष्ठ अधिकारी उपस्थित असलेल्या या बैठकीत मावळ तालुक्यातील सर्व प्रकल्पांना गती देण्यासाठी आवश्यक कार्यवाही तत्काळ करण्याबाबत सकारात्मक निर्णय घेण्यात आले. मावळच्या सर्वांगीण विकासासाठी आमदार शेळके यांचा सातत्यपूर्ण पाठपुरावा आणि दूरदृष्टी यामुळे विकासकामांना नवाच वेग मिळत असल्याचे या बैठकीतून स्पष्ट झाले.
