पिंपरी-चिंचवड:
ओळख पटू नये म्हणून चेहरा विद्रूप करून फेकून दिलेल्या एका अनोळखी तरुणाच्या खुनाचा गुंता सोडवण्यात चाकण उत्तर पोलिसांना यश आले आहे. अनैतिक संबंधांच्या वादातून हा खून झाल्याचे निष्पन्न झाले असून, पोलिसांनी याप्रकरणी दोन तरुण आणि एका महिलेसह एकूण तिघांना बेड्या ठोकल्या आहेत.
काय आहे नेमकं प्रकरण?
गत ११ जानेवारी २०२६ रोजी चाकण जवळील बिरदवडी गावच्या हद्दीत एका नाल्याशेजारी अंदाजे २५ ते ३० वर्षे वयोगटातील तरुणाचा मृतदेह आढळून आला होता. आरोपींनी धारदार शस्त्राने वार करून आणि ओळख पटू नये म्हणून दगडाने चेहरा ठेचून त्याचा निर्घृण खून केला होता. मृताच्या खिशातील मोबाईल आणि ओळखपत्रही गायब असल्याने पोलिसांसमोर मृताची ओळख पटवणे हे मोठे आव्हान होते.
तपासाचे चक्र आणि सीसीटीव्ही फुटेज
वरिष्ठ पोलीस अधिकाऱ्यांच्या मार्गदर्शनाखाली तपास पथकाने परिसरातील सीसीटीव्ही फुटेज, कामगारांच्या वस्त्या आणि सोशल मीडियाचा वापर करून मृताचा शोध सुरू केला. तपासादरम्यान एका मोपेड गाडीची माहिती पोलिसांच्या हाती लागली. त्या गाडीच्या मालकाकडे चौकशी केली असता, ही गाडी त्याचा मित्र निखिल नानासाहेब चव्हाण याने वापरल्याचे समोर आले.
असा उघड झाला गुन्हा
पोलिसांनी संशयावरून निखिलला ताब्यात घेऊन विचारपूस केली असता, त्याने आपल्या गुन्ह्याची कबुली दिली. मृताचे नाव मुंजा धोंडीबा नरहिरे (वय २५, रा. गंगाखेड, जि. परभणी) असल्याचे स्पष्ट झाले.
खुनाचे कारण:
आरोपी निखिलची आई उषा नानासाहेब चव्हाण (वय ४०) हिचे मृत मुंजा याच्याशी अनैतिक संबंध होते. मुंजा हा तिला त्रास देत असल्याने निखिलने त्याचा काटा काढण्याचे ठरवले. त्याने आपला मित्र स्वप्नील नरहरी पारधी (वय १९) याच्या मदतीने हा कट रचला.
अंमलात आणलेला कट
दिनांक ७ जानेवारी रोजी आरोपींनी मुंजाला गंगाखेडहून चाकणला बोलावून घेतले. त्याला निर्जन ठिकाणी नेऊन दारू पाजली आणि तो नशेत असताना कोयत्याने डोक्यावर वार करून त्याचा खून केला. त्यानंतर पुरावा नष्ट करण्यासाठी मृतदेहाचा चेहरा दगडाने ठेचून तेथून पळ काढला. सलग २० दिवसांच्या अथक प्रयत्नानंतर पोलिसांनी तिन्ही आरोपींना अटक केली आहे.
ही कामगिरी कोणाची?
पिंपरी-चिंचवडचे पोलीस आयुक्त विनयकुमार चौबे आणि सह पोलीस आयुक्त डॉ. शशिकांत महावरकर यांच्या मार्गदर्शनाखाली, पोलीस उप-आयुक्त मारुती जगताप, सहाय्यक आयुक्त सचिन कदम, वरिष्ठ पोलीस निरीक्षक जितेंद्र कदम व त्यांच्या पथकाने ही कारवाई यशस्वीरीत्या पार पाडली.
