पिंपरी चिंचवड (दि. १४ फेब्रुवारी २०२६) :- सर्वत्र व्हॅलेंटाईन डेचे वातावरण असताना पिंपरी-चिंचवड शहरात एक धक्कादायक घटना घडली आहे. आकुर्डीतील गुरुद्वारा चौकात एका २३ वर्षीय तरुणाने गळफास घेत आत्महत्या केल्याची घटना समोर आली असून त्यामुळे परिसरात खळबळ उडाली आहे. प्राथमिक तपासात प्रेमसंबंधातून हे टोकाचे पाऊल उचलल्याची शक्यता वर्तविण्यात येत आहे.
मिळालेल्या माहितीनुसार, चिंचवड पोलीस स्टेशन हद्दीतील गुरुद्वारा चौकाजवळील एका घरात समर्थ संजय माळी (वय २३) या तरुणाने दुपारच्या सुमारास गळफास घेत आपली जीवनयात्रा संपवली. समर्थ माळी हा मूळचा सोलापूर जिल्ह्यातील रहिवासी असून मागील काही दिवसांपासून तो आकुर्डी रेल्वे स्टेशनजवळील गुरुद्वारा कॉलनी परिसरात मित्रांसोबत राहत होता.
आज दुपारी त्याचे मित्र मेसमध्ये जेवणासाठी बाहेर गेले असताना समर्थ एकटाच खोलीत होता. त्याचवेळी त्याने गळफास घेत आत्महत्या केल्याची प्राथमिक माहिती समोर आली आहे. मित्र परत आल्यानंतर ही घटना उघडकीस आली. घटनेची माहिती मिळताच चिंचवड पोलिसांनी तात्काळ घटनास्थळी धाव घेतली.
दरम्यान, आत्महत्येचे नेमके कारण अद्याप स्पष्ट झालेले नाही. प्रेमसंबंधातून त्याने हे पाऊल उचलल्याची चर्चा असली तरी पोलिसांकडून याबाबत अधिकृत दुजोरा देण्यात आलेला नाही. या प्रकरणी चिंचवड पोलिसांनी आकस्मिक मृत्यूची नोंद केली असून पुढील तपास सुरू आहे.
