पिंपरी (दि. ०६ डिसेंबर २०२५) :- पिंपरी-चिंचवड महापालिकेची निवडणुक दृष्टिक्षेपात आल्याची चाहूल लागताच शहरातील राजकीय हालचालींना अचानक ‘टर्बो’ लागला आहे. सर्वच पक्षांमध्ये उमेदवारीसाठी इच्छुकांची धावपळ चांगलीच वाढली असून, पक्ष नेत्यांच्या निवासस्थानी तसेच कार्यालयांमध्ये सकाळपासून गर्दी उसळू लागली आहे. गेल्या काही दिवसांपासून शहरात वरिष्ठ नेत्यांच्या भेटीगाठींनाही मोठी चालना मिळाली असून, तिकीट वाटपाचा तणाव स्पष्टपणे जाणवत आहे.
महायुतीतील भाजप, शिवसेना, राष्ट्रवादी अशा प्रमुख पक्षांतून गटबाजी, अंतर्गत स्पर्धा आणि शक्तिप्रदर्शनाची चढाओढ तीव्र झाली आहे. तुलनेत महाविकास आघाडीच्या गोटात मात्र, भयान शांतता पसरल्याचे चित्र दिसत आहे.
दरम्यान संभाव्य उमेदवारांकडून छोट्या सभा, स्थानिक प्रश्नांवर प्रतिक्रिया, प्रभावी व्यक्तींशी सतत भेटी अशा उपक्रमांना वेग आला आहे. काही ठिकाणी अनधिकृत बॅनर्स व पोस्टर्स लावून स्वतःची लोकप्रियता दाखवण्याचा प्रयत्नही सुरू आहे.
दरम्यान, सोशल मीडियावर उमेदवारांनी आक्रमक मोहीम सुरू केली असून, फेसबुक-इन्स्टाग्राम-एक्सवरून जनसंपर्क दौऱ्यांचे फोटो, व्हिडीओ, रील्स आणि ‘मी तयार’, ‘माझा प्रभाग माझी जबाबदारी’ अशा टॅगलाईन्सची चलती दिसत आहे. बुस्टेड पोस्ट, डिजिटल कॅम्पेन, वर्क रिपोर्ट कार्ड यांच्या माध्यमातून स्वतःची छबी मजबूत करण्याची चढाओढ वाढली आहे.
आचारसंहिता लागण्याच्या चर्चेला वेग येताच पक्षांमध्ये तिकिटांचे गणित अंतिम टप्प्यात पोहोचले आहे. एका जागेसाठी अनेक इच्छुक रांगेत असल्याने पक्ष समन्वयकांवर ताण वाढला असून, अंतर्गत लॉबिंगनेही जोर धरला आहे. निवडणुक जवळ येत असल्याने “ज्याचं जास्त दिसणं, त्याची शक्यता जास्त” हे सूत्र सर्वच इच्छुकांनी पकडलेले स्पष्टपणे दिसत आहे.
शहरात राजकीय तापमान दिवसेंदिवस वाढत असून, येत्या काही दिवसांत महापालिका निवडणुकीची अधिकृत धावपळ सुरू होण्याचे संकेत मिळत आहेत.
