पिंपरी चिंचवड:- फुगेवाडी येथे विषारी दारू प्रकरणात १७ जणांचा मृत्यू झाल्यानंतर त्यांच्या कुटुंबीयांना आर्थिक मदत देण्याबाबत महापालिका सर्वसाधारण सभेत चर्चा झाली. महापौर रवी लांडगे यांनी मृतांच्या नातेवाइकांना प्रत्येकी एक लाख रुपयांची मदत नगरसेवकांच्या एका महिन्याच्या मानधनातून देण्याची सूचना केली होती. मात्र, या प्रस्तावाला अनेक नगरसेवकांनी विरोध दर्शविला.
दारू सेवनामुळे मृत्यू झालेल्या व्यक्तींच्या कुटुंबीयांना मदत करणे योग्य नसल्याचे मत काही नगरसेवकांनी मांडले. चुकीच्या कृतींना प्रोत्साहन मिळेल, अशी भूमिका घेत त्यांनी प्रस्ताव फेटाळून लावला.
समाजोपयोगी व चांगल्या कामांसाठी एका महिन्याचे नव्हे तर वर्षभराचे मानधन देण्याची तयारी असल्याचेही काही सदस्यांनी स्पष्ट केले. यामुळे महापौरांच्या सूचनेला सभेत अपेक्षित पाठिंबा मिळाला नाही. या विषयावर सभागृहात काही काळ जोरदार चर्चा झाली.
