पिंपरी चिंचवड :- पिंपळे गुरव येथील अनधिकृत बांधकामावर कारवाई न करण्यासाठी 70 हजार रुपयांची लाच स्वीकारताना रंगेहात पकडण्यात आलेल्या पिंपरी-चिंचवड महापालिकेच्या स्थापत्य अभियांत्रिकी सहाय्यक तथा बीट निरीक्षक उमेश अरुण लोंढे यांना अखेर सेवेतून निलंबित करण्यात आले आहे. आयुक्त डॉ. विजय सूर्यवंशी यांनी निलंबनासह विभागीय चौकशीचे आदेश दिले आहेत.
लोंढे यांनी पिंपळे गुरव येथील एका तक्रारदाराच्या तीन मजली अनधिकृत बांधकामावर कारवाई टाळण्यासाठी 70 हजार रुपयांची मागणी केली होती. ही रक्कम स्वीकारताना रहाटणीतील ड क्षेत्रीय कार्यालयाच्या पार्किंगमध्ये लाचलुचपत प्रतिबंधक विभागाने (एसीबी) त्यांना 12 जून रोजी रंगेहात पकडले. याप्रकरणी वाकड पोलिस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला असून न्यायालयाने त्यांना पोलिस कोठडी सुनावली होती.
लोकसेवक म्हणून पदाचा गैरवापर, कर्तव्यातील सचोटीचा अभाव आणि सेवा नियमांचे उल्लंघन केल्याचा ठपका ठेवत लोंढे यांच्याविरुद्ध विभागीय चौकशी सुरू करण्यात आली आहे. विशेष म्हणजे त्यांना महापालिकेत रुजू होऊन अवघे तीन महिने झाले होते.
